kimo795 عضو جديد
عدد المساهمات : 10 نقاط التميز : 110 تاريخ التسجيل : 19/03/2010
| موضوع: ******************* يوميات شُمُور محترم ****************** بقلمي الجمعة مارس 19, 2010 8:04 pm | |
| **********
أول حاجة:هاد شي ماشي حياتي راه غير لخيال
**********
فقت من النعاس و كيف ديما بكري مع 12h.00 و أول شئ تنحل عليه عيني هي تلك الورقة اللي فيها الإمضاء ديال وزير التعليم العالي و تكوين الأطر أو بالأحرى اللي سميتها الدبلوم، بقات فيا غير هاديك ل 50 درهم باش درت ليها لكادر أُو في هاد النهار بالضبط قررت أني نحيدها من الحيط أو لُوحها تحت نموسية، ماعليناش أول حاجة تنديرها هي تنتوضى أُو تنصلي الصبح أو تنطلب من الله باش يسمح لي حيت مصليتش في الوقت أُو من بعد دِريكت لكوزينة إيوَ راه خَصنا نفطرو، سيرتو سمعت بلي الفطور هو أهم وجبة في نهار كامل و لهدا تنشرب 4 لكيسان ديال أتاي أُو تنطحن خبزة ديال الgمح حرفية حيت هاداك شي ديال لفروماج أُو لكاشير... غير تخربيق كيفما تايقول لواليد أُو ملي تنعمر لكريشة تنجبد لكارت كيشي -فيزا- من بزطامي أُو تنخشيها تحت التلفزة أُو تنتيري 10 دراهم أُو ديريكت عند لعور مول الحانوت -هارا وا حد جوج ماركيز - أُو دكيكة راني مانسيتهاش و ديال أتاي، تنمشي لبلاصة اللي ولات تتعرفين و متتسخاش بيا حيت تمَّ كتبت gـاع لقصائد دياولي ايوا هارا نكمي و نتكمَّ باش نعرف آش تمَّ، هاهو الضهر تاي أدن اللهم رب هاده الدعوة التامة و الصلاة...تنأديو لفريضة ديالنا أو تنطلب من الله يفرج عليا و على لجميع، هاهي لواليدة تتغوت من الشرجم وا حكيم واا حكييم وااا حكيييم و تّ تعالى تغدَّ هداك لمسخوط، تناكلو هداك شي اللي قسم الله مجموعين أو تنضحكو مجموعين مع التشرشير ديال أتاي اللي تيتفنن فيه لواليد أو مرة مرة تنهز عيني
لمـgانة ، دابا وصلات 2h30 حايد الضحك و هارا لمعقول تنهز صاك ديالي و تنمشي لخدمة، خوكم تاجر كبير و معروف في الدرب كامل و في السواق، تنوصل تنحل لحانوت أو لخدَّامة دياولي تايحطو السلعة أخخخ ياكما َتَيْقتُوني راني غير تنبيع و نشري في الجوطية، لموهيم ملي تنوصل تنفرش الفراشة ديالي و تنحط السلعة شي سَبْيبطات شي سريولات و لا أي حاجة تتجيب لفلوس و تَْنتصنطح مع الشمس اللي مبقاتش تتـgـر فيا و تنبرك على شي كريطينة و لكن عين هنا و عين لهيه حيت كاينا غفل طارت عينك و شفارة تاهوما تي ترزقو على وليداتهم و تي تسناو غير الغفلة لموهيم لا سهيتي ولا َرَّمشْتي طارت ليك شي بياسة،
إيوا سكت هاهو واحد لكليان تيقلب في واحد السروال: الكليان: بشحال أصاحبي هاد السروال أنا: 40 درهم أ زين الكليان: تا آشمن 40 درهم أنا: وا غير صاوب أصاحبي ، هارا 35 درهم الكليان: غادي نعطيك حَمْرة أنا: َتنْخرَّج عيني و تنـgـول ليه واش هاد سروال ديال حمرة الكليان: الله يعاونك أصاحبي أنا: تندخل عيني، تعالى تعالى، هارا 25 درهم، هارا 20درهم يلاه غير خود، راه غير بغينا نتسفيلو من عندك الكليان: ديرو فشي ميكة أنا: بحمرة و باغي لميكة الكليان: نعااام أنا: لا والو بصحة و راحة الله يخلف ففف إيوا ها حنا داخلنا واحد 10دراهم لمهيم نفتحو لباب و كيفما تيقول جدي إلا كان لفتوح تيكون لقلب مشروح، ماعليناش نسيفطو على شي براد ديال أتاي و على شي gــويروات نشدو بيهم الستون، أو ديما عين هنا و عين لهيه، راه جوطية هادي و ما أدراك ماجوطية،
هاهو واحد ساط هاز واحد لميكة كحلة: أنا: صاحبي شي بياس لبيع ساط: كاين واحد سباط دوريجين أنا: هارا نشوف، أمممم نمرة 42 أو تنشوف ليه غير بريط شحال تيلبس في رجلو باش نتأكد بلي ديالو أو مخاونوش من شي جامع و وو بشحال ساط: 60 درهم أنا: بزاف أصاحبي ، غادي نعطيك 20درهم ساط: لا لا عاطينِّي 40درهم... أنا: اللي عطى ما دا غادي نعطيك 25درهم و الله ما نزيدك ريال ساط: يلاه غير خودو جاب الله واحد الهباط أ سباط واخ مسخ شوية و لكن غير واحد تصبينة و غسلة و هاهو ناضي. تنبقاو على هاد لحال, بيع و شري بيع و شري حتى يضلام لحال و بالضبط مع الأدان ديال المغرب تنجمع لحانوت بغيت نقول لفراشة، الله يجعل لباركة جاب الله واحد 40درهم، كل نهار و رزقو.
هاهو تيليفون تيصوني هاهو تيصوني أمممم
ألو حبيبة لباس عليك حبيبي لباس، توحشتك حتى أنا توحشتك بزاف اف إيوا بغيت نشوفك ضروري أه ولكن خوك مكمل وا صافي غير جي لقهوة على حسابي أُوكِي نتلاقاو مع 20h00 حدا تيليبوتيك لحمر أوكي باي حبيبي و عنداك تعطل بحال ديما باي و من بعد لقاء الحب و الغرام بطبيعة لحال تايجي راسي دارني و منفوخ بالهضرة ديال ديما اللي حفضتها عن ضهر قلب، راه جاوني لخطاب، إمتا غادي تجي تخطبني، راني عيت مانتسناك...............ولكن أول متنوصل لدار و تنشرب أتاي ديال لواليدة و تنشم جاوي صلبان تايفوتني لحال، و من بعد لَعْشَ تنخدَّم هاداك الطارو كيفما تيقول ليه لواليد و هاراك لسهرة و لقصارة مع منتدى الفكاهة و منتديات ستار تايمز حتى 3 ولا 4 ديال صباح
و خبيرتنا مشات مع لواد و أنا بقيت مع لجواد
********
بقلمي
حكيم | |
|
simokech مراقب
عدد المساهمات : 117 نقاط التميز : 23676 تاريخ التسجيل : 07/03/2010 الموقع : مراكش
| موضوع: رد: ******************* يوميات شُمُور محترم ****************** بقلمي السبت مارس 20, 2010 6:12 am | |
| هههههه موضوع صداع ابا حكيم فكرتينا فايام التشوميرة والجيب خاوي المهم نتا راك بعدا درتي لي عليك مابقيتيش قاعد ماشي بحال شي وحدين الخدمة الله يجيب ويبقى غير كايشوف مايدير والو موضوع واعر اساط في انتظار جديدك تقبل سلامي | |
|
المدير Admin
عدد المساهمات : 109 نقاط التميز : 1261157 تاريخ التسجيل : 06/03/2010
| موضوع: رد: ******************* يوميات شُمُور محترم ****************** بقلمي السبت مارس 20, 2010 11:55 am | |
| مشكور خويا عبد الحكم على الموضوع المفروح ننتظر جديدك | |
|