صحيح لي gال الناس كتختالف على بعضياتها;وصحيح منين يجي شي فاهم يقوليك صبعان يديك ما تتشابه ,فعلا صبعان اليد ما يتشابهو,وهادشي كينطابق على افراد العائلات فواحد مايشبه الاخر حيث فيها شي قماقم ما يشبه ليهوم حد .وهادوك هوما لي غادي نهدر عليهوم فهاد الموضوع.
حيت فكل فاميلة كانلقاو هاد الاشخاص كتمييز بيهوم العائلة
ل comique ديال الفاميلة هادا ديما تلقاه مقبول واخا لسانو داير كي المقص,غير يهدر تلقا بنادم يتكلاطة بالضحك وديما العيلة دايرا بيه غير يوصل يجريو عندو باش ينشطو.واخا يشد فيهوم الدنيا هانية
كاتب العائلة او شاعر العائلة زعما شاعر ديال الgعدة هادا كيكون كبير شوية وبعض المرات ساد على راسو البراهش ما كايحملوهش ههههه كايشوفوه ممل حيت مايفهموا تاوزة من الكلام لي كايقول ولكبار يgعدو معاه ومتظاهرين راهوم فاهمين واخا تاهوما مافهمين تازفتة.
بركاكة العائلة,ميمتي هاد المخلوقة عادة كتكون غير مرات العم ولا مرات ولاد العم,هادي هي الجزيرة ديال الفاميلة كل لخبار تلقاها عندها,وتدير لي فجهدها باش توصل لخبار وبعض لمرات كتزيد فيهوم وخا يكون داكشي صعير تبدا تنفخ فيه تادير ليك شي مونتيف الله يحفظ وصافي
le rich ديال العائلة زعما الغني بوكو لعاقة فكل عائلة كنلقاو شي واحد لاباس عليه ومراتو ديما تتكون محل انظار لعيالات لخريين شنو لبسات, فين مشات, اشنو دارت ,وكتكون لبركاكة ديال العائلة ديما لصقاهة ههههه باش تجيب لخبار الصحيحة ,لي لاباس عليه ومراتو فغالب الاحيان كيكونو منفوخين هازيين النيف وما يطولوش معاك فالكلام والفشوش زايدين فيه ويديرو معاك جوج ندغات ويقولو ليك شبعت النفخة زعما هههههه
كبير العائلة (الحج جمعة هههه)هادا هو لي خاصك تحتارم بزاف هادا هو لي ديما كايكون دافعو كبير,يبقا عليك ديما منين كنت gدك كنت ندير وكنت ندير وخا بعض لمرات غير كايشوت عليك ولكن خاصك تصنت ليه ,ونص كلامو والقصص ديالوا بعض لمرات غير كدوب هههههههسمح لي الحاج جمعة
مسخوط العائلة اميمتي ديما جايب العار لعائلة بفعايلو لكحلة كولشي مايحملو ولكن تيخافو منو تدير معاه شي زيادة مشيت خلا حيت كولشي زايد ناقص عندو
مغترب العائلة لvاكونسي حيت كل عائلة عندها شي واحد دربها بشي حرgة من قبل لبرا وخاصة اروبا ,فالصيف تلقا كولشي يتسناه كاين لي يتسناه حيت توحشوا وكاين ليتسنا على قبال les cadeaux هههه غير يوصل وكيف داير افلان والله تتوحشناك كيف عامل تما وشنو الاخبار وتلقاه تاهوا زايد فيخرات والله ماساليت نحك راسي بحال ايلا داير شركة تما ههههه
القزقوز ديال العائلة الزين ديال العائلة لبوgوس ديال العائلة هادا كيكون شوي مغرور حاس براسو مايخلي بنات العم وبنات الخال وبنات العمة وبنات الخالة هانيين هههه ديما مربوط حداهم عينو زايغة و ديما فالعراسات مقزقز ومفركس يحساب ليك هو لعريس
لمشييكة ديال لعائلة هادي ديما gدام لمراية ماتفرقهاش ديما الروايح والمشية فوق قرون الصبع والظفران طوال وديما تلقاها gاعدة مع لبنات تبان عليهوم باش يبقاو يمدحوا فيها وديما تلقى لمفروح ديال لبوgوس ديال العائلة وراها ههههه
طبيب العائلة اميمتي هادا تلقاه محن مسكين ديما لفامي جايا عندو مميتي ظهري درني رجلي دروني معدة ديالي دراتني دير تلفزة هنا وسير وسير وديما فابور هههههه
لفاهم ديال العائلة هادا ديما دافع جبهة ديما التصنطيح تلقاهه ديما يgولو هادي خسرات خليها تايجي خوك يgادها سير عند ولد عمك جيبو يشوف لينا هادشي مالو ومنين يgادو تسمع والله ايلا راك واعر عفريت كيف درتي ليها وتلقاه يتجبه عليهوم ويتنفخ تاهوا داكشي ديال ماليه ماتعرفوش ليه ههههه
فكل فاميلة تلقا هاد القماقم والله يستر منين يتجمعوا ماتعرفش اش يوقع هههههههه
يالله نتمنا الموضوع يعجبكم والى موضوع اخر في القريب العاجل
تقبلوا سلامي